ئەعرەجی: حكومەت رێگە نادات خاكی عێراق ببێتە شوێنی هێرشكردنە سەر وڵاتانی دراوسێ

22:32 2024-02-14 105355 عێراق 0

2024-02-14

105355

ئەمڕۆ چوارشەممە، راوێژكاری ئاسایشی نیشتمانی قاسم ئەعرەجی تەئكیدیكردەوە: حكومەت ڕێگە نادات خاكی عێراق ببێتە شوێنی هێرشكردنە سەر وڵاتانی دراوسێ یان هەر وڵاتێكی دیكە.
نوسینگەی راگەیاندنی راوێژكاری ئاسایشی نیشتمانی لە بەیاننامەیەكدا رایگەیاند: قاسم ئەعرەجی ڕاوێژكاری ئاسایشی نیشتمانی لە شوێنی نیشتەجێبوونی خۆی لە بەغداد لەگەڵ غولام حسێن موحسینی ئیژەیی سەرۆكی دەسەڵاتی دادوەریی ئێران كۆبووەوە.
ئاشكراشیكرد: لە كۆبوونەوەكەدا پێداچوونەوە بە پەیوەندییە مێژووییەكان كرا كە هەردوو وڵات كۆدەكاتەوە و جەختكرایەوە لەسەر گرنگی بەردەوامبوون لە بەهێزكردنی هاوكارییەكانی نێوان بەغدا و تاران لە هەموو ئاستەكاندا.
بەپێی بەیاننامەكە، ئەعرەجی تەئكیدیكردەوە: كە ئاسایشی عێراق و ئێران یەكە، هەروەها حكومەتی عێراق سورە لەسەر جێبەجێكردنی ڕێككەوتنی ئەمنیی نێوان هەردوو وڵات، و وتیشی: هەردوو وڵات بەردەوامن لە كاركردن بۆ جێبەجێكردنی مەرجەكانی ڕێككەوتنە ئەمنییەكە.
ئەعرەجی، جەختیشیكردەوە: لەسەر گرنگی كاركردن بۆ چەسپاندنی ئاسایش و سەقامگیری ناوچەكە لە ڕێگەی هاوكاریی هەردوو وڵات لە یارمەتیدانی ئەوانی دیكە بۆ چارەسەركردنی كێشەكانیان، و دووپاتیشیكردەوە: كە حكومەتی عێراق ڕێگە نادات خاكی عێراق ببێتە شوێنی هێرشكردنە سەر وڵاتانی دراوسێ یان هەر وڵاتێكی دیكە، و وتیشی: هەڵوێستی عێراق جێگیرەو ڕەتكردنەوە و ئیدانەكردنی كوشتنی خەڵكی بێتاوانە لە كەرتی غەززە.
لای خۆیەوە سەرۆكی دەسەڵاتی دادوەریی ئێران جەختی لە گرنگی هەماهەنگی هەردوو وڵات لە پێناو هەموو لایەكدا كردەوە، و تەئكیدیشی لە پێویستی هەوڵدان بۆ گەیشتن بە ئاسایشی بەردەوام كردەوە بە شێوەیەك كە بەرژەوەندییە هاوبەشەكانی وڵاتانی ناوچەكە و جیهان بەدەستبهێنێت.