سەرۆک کۆمار د.لەتیف جەمال رەشید دوپاتیکردەوە عیراق کاردەکات بۆ بەهێزکردنی هەماهەنگییە دوو قۆڵییەکان لەگەڵ ئیستۆنیا لە بوارەکانی ئابوری و ژینگە و کشتوکاڵ و وزەی نوێبووەوە، هەروەها باشترکردنی رۆڵی زانست و تەکنۆلۆژیا لەڕێگەی هەماهەنگی لەگەڵ وڵاتانی پێشکەوتوو لەو بوارەدا بە ئیستۆنیاشەوە.
لەمیانەی کۆنگرەیەکی رۆژنامەوانی هاوبەشدا لەگەڵ ئەلار کاریس سەرۆکی ئیستۆنیا، کە ئەمڕۆ سێشەممە 16-1-2024 لە کۆشکی بەغداد بەڕێوەچوو، سەرۆک کۆمار رۆڵی بەشداریکردنی راوێژکارانی سەربازیی ئیستۆنیای لەهێزە  فرەنەتەوەییەکان بۆ مەشقپێکردن بە هێزە چەکدارەکانی عیراقی بەرزنرخاند و ئاماژەی بەوە کرد، کە عیراق ماوەی چەند ساڵە سەقامگیریی ئاسایش بە خۆوەدەبینێت و لەڕێگەیەوە هەوڵی پەرەپێدانی دەرفەتی وەبەرهێنان دەدات و بەڕێزیان خۆشحاڵی بە بەشداریکردنی کۆمپانیاکانی ئەستۆنیا و هاوبەشیکردنیان لە پەرەپێدانی پرۆسەی بونیادنان و گەشەپێدان لە عیراقدا دەربڕی.
سەرۆک کۆمار بەتوندی سەرکۆنەی هێرشەکانی بۆسەر خاکی عیراق کرد و جەختی لەوە کردەوە، ئەو هێرشە پێشێلکردنێکی ئاشکرای بنەماکانی دراوسێیەتییە، کە یاسا نێودەوڵەتییەکان دانیان پێدا ناوە، لەمڕووەوە سەرکۆنەی ئەو هێرشەی کرد، کە چەند کاتژمێرێک لەمەوبەر کرایە سەر هەولێر و ناوچە جیاجیاکانی کوردستان و لە ئەنجامدا خەڵکی سڤیلی بێتاوان بونە قوربانی.
سەبارەت بە پێشهاتەکانی ناوچەکەش، سەرۆک کۆمار سەرکۆنەی هێرشە بەردەوامەکانی دژبە کەرتی غەزە و ناوچەکانی دیکەی فەلەستینی دوپاتکردەوە و داوای راگرتنی دەستبەجێ و بێ مەرجی جەنگ و رێگەدان بە گەیشتنی یارمەتییە مرۆییە بەپەلەکان کرد بۆ یارمەتیدانی زیانلێکەوتوانی ئەو هێرشە وەحشیگەرانەیە، هەروەها هەڵوێستی جێگیری عیراقی دووپاتکردەوە سەبارەت بە پرسی فەلەستین و مافی گەلی فەلەستین لە دەوڵەتێکی سەربەخۆ لەسەر خاکەکەکەیان و قودسی شەریف، کە پایتەختیەتی.
لەلای خۆیەوە، سەرۆکی ئیستۆنیا سوپاس و پێزانینی خۆی بۆ سەرۆک کۆمار دەربڕی بۆ ئەو پێشوازییە گەرمە و وتی "خۆشحاڵم وەک یەکەم سەرۆکی ئیستۆنیا، کە بە سەردان هاتومەتە عیراق".
هەروەها سەرۆک کاریس، جەختی لەوە کردەوە، کە گەلی عیراق پێگەیەکی تایبەتیان هەیە لەلای گەلی ئیستۆنیا، چونکە عیراق کلتور و شارستانیەتێکی کۆنی هەیە و هەموو دەقە پیرۆزەکان لە عیراقەوە هاتون، هەروەها ئەکادیمی و زانستەکان، پەیوەندییە دوو قۆڵییەکانمان چالاکن و عیراق هاوبەشێکی گرنگە لە گۆڕەپانی نێودەوڵەتیدا.
سەرۆکی ئیستۆنیا ئاماژەی بەوەدا، کە وڵاتەکەی بەشێوەیەکی چالاکانە بەشداری کردوە لە بەرقەرارکردنی ئاسایش و سەقامگیری لە عیراق و خۆرهەڵاتی ناوەڕاست و لەمڕووەوە قوربانیشیان داوە و خۆشحاڵی خۆی دەربڕی بە بینینی هەوڵەکانی هێزە ئەمنییەکانی عیراق بۆ هێنانەکایەی ئاسایش و سەقامگیری.
سەرۆکی ئیستۆنیا، ئاماژەی بەوەشکرد، عیراق ئێستا زیاتر لە جاران ئاشتی و سەقامگیری و خۆشگوزەرانی بەخۆوەدەبینێت و لەمدواییانەدا تێبینی ئەوەیان کردوە، هەروەها سەقامگیریی عیراق سەقامگیرییە بۆ ناوچەکە و لەم چوارچێوەیەدا پشتیوانی وڵاتەکەی بۆ عیراق دوپاتکردەوە.
سەرۆک ئەلار کاریس سەرکۆنەی هەموو جۆرەکانی تیرۆری کرد، کە هەڕەشەیەکی گەورەیە بۆسەر ئاشتی و ئاسایشی نێودەوڵەتی، چونکە کوشتنی خەڵکی بێتاوان و بڵاوکردنەوەی تیرۆر نابێتەهۆی بەرقەراربونی ئاشتی و سەقامگیری. ئاماژەی بەوەشکرد، ئیستۆنیا لە شەڕی دژبە تیرۆریزم لەگەڵ عیراقدایە و لەڕێگەی هاوپەیمانیی نێودەوڵەتی و یەکێتی ئەوروپاوە پشتیوانی پێشکەشکردوە.
هەروەها سەرۆکی ئیستۆنیا رایگەیاند، لە وتووێژەکاندا لەگەڵ سەرۆک کۆمار تاووتوێی ئاڵنگارییەکانیان لە ئەوروپا و خۆرهەڵاتی ناوەڕاستدا کردوە، هەروەها باسیان لە بارودۆخی مرۆیی غەزە کردووە، کە نیگەرانییەکی گەورەیە بۆ هەمووان و جەختی لەوە کردەوە، ئیستۆنیا پشتیوانی لە هەوڵە نێودەوڵەتییەکان دەکات بۆ راگرتنی شەڕ و پێویستی دۆزینەوەی چارەسەرێک بۆ قەیرانی مرۆیی بەپێی یاسا نێودەوڵەتییەکان و بڕیارەکانی نەتەوەیەکگرتووەکان.
هەروەك سەرۆکی ئیستۆنیا رایگەیاند، لەگەڵ سەرۆک کۆماری عیراق باسیان لە شەڕی روسیا و ئۆکرانیا کردوە، جەختی لەوەشکردەوە، کە پێویستە کاربکرێت بۆ چەسپاندنی ئاشتی و خوشگوزەرانی تا هەموان بگرێتەوە.