سەرۆک کۆمار پێشوازی لەفەرماندەی نێردەی ناتۆ لەعێراق دەکات

20:34 2025-10-13 30880 عێراق 0

2025-10-13

30880

سەرۆک کۆمار د.لەتیف جەمال ڕەشید، ئەمڕۆ دووشەممە ١٣ی تشرینی یەکەمی ٢٠٢٥ لە کۆشکی بەغداد، پێشوازی لە فەرماندەی نێردەی پەیمانی باکووری ئەتڵەسی (ناتۆ) لە عێراق، جەنەڕاڵ کریستۆف هێنتزی و شاندی یاوەری کرد.
سەرۆکایەتی کۆمار لەڕاگەیەندراوێکدا کەدەستی موتەڵع کەوتووە بڵاویکردەوە،لەمیانی دیدارەکەدا سەرۆک کۆمار پەرۆشی عێراقی دووپاتکردەوە بۆ بەهێزکردنی هاریکاری لەگەڵ ناتۆ لەبوارەکانی مەشق و ڕاهێنان و پاڵپشتی ڕاوێژکاری وپەرەپێدانی توانای سەربازی، کەبەشدارە لەپەرەپێدانی دامەزراوە سەربازییەکانی عێراق.
هەر لەدیدارەکەدا پێشهاتەکانی ناوچەکە و پێویستی بەهێزکردنی هەوڵە نێودەوڵەتییەکان بۆ چەسپاندنی ئاسایش و سەقامگیری و ئاشتی تاوتوێ کران، بەرێز سەرۆک کۆمار، ئاماژەی بەوەدا کە عێراق دۆخێکی ئاسایش و سەقامگیری بەخۆیەوە دەبینێت و سەرقاڵی خۆ ئامادەکردنە بۆ پرۆسەیەکی دیموکراسی و ئەنجامدانی هەڵبژاردنی پەرلەمانی داهاتوو و هەوڵیش دەدەین کە ئەم هەڵبژاردنانە ئازاد و دادپەروەرانە و نوێنەرایەتی هەموو چین و توێژەکانی گەلی عێراق بن.
هەروەها بەڕێزیان، باسی لەبەشداریکردنی لە خولی هەشتاهەمین کۆبوونەوەی گشتی نەتەوە یەکگرتووەکان کرد، کە لەوتارەکەیدا تیشکی خستە سەر هەڵوێستەکانی عێراق سەبارەت بەپرسە ناوخۆیی و نێودەوڵەتییەکان و ئاماژەشی بەسازدانی کۆنفرانسێکی نێودەوڵەتی سەبارەت بە گەڕانەوەی کەسانی سیڤیل لە کەمپی ئەلهۆل و کەمپەکانی دەوروبەری و ناوەندەکانی دەستبەسەرکردن و پشتیوانی نێودەوڵەتی بۆ عێراق لە داخستنی ئەم دۆسێی کرد.

لەلای خۆیەوە فەرماندەی نێردەی ناتۆ سوپاس و پێزانینی خۆی بۆ سەرۆک کۆمار دەربڕی بۆ ئەو پێشوازییە گەرمە و ئامادەیی ناتۆی دووپاتکردەوە بۆ بەردەوامبوون لەپاڵپشتیکردنی عێراق لەڕێگەی بەرنامەکانی مەشق و ڕاوێژکارییەوە و بەهێزکردنی چوارچێوەی هاوبەشی هەنووکەیی بۆ خزمەتکردنی بەرژەوەندییە هاوبەشەکان.