فوئاد حسێن: کۆمەڵگەی سوریا وەک ئێمە بەدەست سیاسەتەکانی بەعسەوە زەرەرمەند بوه‌

19:58 2025-03-14 57872 عێراق 0

2025-03-14

57872

فوئاد حسێن، وه‌زیری ده‌ره‌وه‌ی عێراق ڕایگه‌یاند،پەیوەندییەکانی عێراق و سوریا مێژویین،کۆمەڵگەی سوریاش وەک ئێمە بەدەست سیاسەتەکانی بەعسەوە زەرەرمەند بوه‌.
فوئاد حسێن ێواره‌ی ئه‌مڕۆ هه‌ینی له‌میانی كۆنگره‌یه‌كی ڕۆژنامه‌وانیدا له‌ شاری به‌غدا له‌گه‌ڵ ئه‌سعه‌د شه‌یبانی هاوتا سورییه‌كه‌ی، ڕایگه‌یاند، "پەیوەندییەکانی عێراق و سوریا مێژویین، هەڕەشەی دەستبەجێ بۆ سەر کۆمەڵگەی سوریا و عێراقی هاوبەشن، کۆمەڵگەی سوریاش وەک ئێمە بەدەست سیاسەتەکانی بەعسەوە زەرەرمەند بوه‌".
ئاماژەی بەوەشکرد، سوریا لە ململانێیەکی بەردەوامدا بو بۆ ڕزگاربون لە ڕژێمی تۆتالیتار و ڕژێمی تاکڕه‌و، "لەگەڵ شاندی سوریاش گفتوگۆمان کرد لەسەر پێکهێنانی ژورێکی ئۆپەراسیۆنی هاوبەش بۆ ڕوبەڕوبونەوەی داعش".
فوئاد حسێن باسی له‌وه‌شكرد، "لەگەڵ لایەنی سوریا باسمان لە جموجۆڵەکانی داعش و بیرۆکەی پێکهێنانی ژورێکی ئۆپراسیۆنی هاوبەش کرد بۆ ڕوبەڕوبونەوەی ڕێکخراوەکە، ڕەنگە ئەزمونی عێراق سودی بۆ سوریاییەکان هەبێت لە ڕوبەڕوبونەوەی ئاستەنگە ئەمنییەکاندا، پێشتر عێراق هه‌مان ئه‌و دۆخه‌ی بینیوه‌، ناسەقامگیری لە سوریا ڕاستەوخۆ کاریگەری لەسەر دۆخی عێراق هەیە، عێراقییەکانیش باجێکی قورسیان داوە بۆ شەڕی تایفەگەری".
فوئاد حوسێن جه‌ختی له‌وه‌كرده‌وه‌، "باسمان لە ڕوداوەکانی کەناراوەکانی سوریا کرد و نیگەرانی خۆمان دەربڕی سەبارەت بەو شتانەی لەوێ ڕودەدەن، چونکە پشتگوێخستنی هەر پێکهاتەیەکی کۆمەڵگە توڕەیی و پشێوی دروست دەکات کە تیرۆریستان دەیقۆزنەوە".
وه‌زیری ده‌ره‌وه‌ی عێراق پشتیوانیی وڵاته‌كه‌ی بۆ ڕێککەوتنی نێوان ئەحمەد شه‌رع و مەزلوم كۆبانێ دەربڕی، بەو هیوایەی لەپێناو بەرژەوەندی سوریا جێبەجێ بکرێت و رێكه‌وتنه‌كه‌ی به‌ گرنگ ناوبرد.