وەزارەتی نەوتی پلانەکانی بۆ بەرزکردنەوەی ئاستی بەرهەمهێنان بۆ زیاتر لە شەش ملیۆن بەرمیل نەوت لە ڕۆژێکدا ڕاگەیاند

23:02 2025-03-23 59673 عێراق 0

2025-03-23

59673

وەزارەتی نەوتی عێراق، پلانەکانی بۆ بەرزکردنەوەی ئاستی بەرهەمهێنان بۆ زیاتر لە شەش ملیۆن بەرمیل نەوت لە ڕۆژێکدا تا ساڵی 2029 ڕاگەیاند، دەڵێت، "دیارترین پڕۆژەکانی کەرتی دەرهێنان لە ئێستادا، پڕۆژەی پەرەپێدانی غازە لە کێڵگەی ئەرتاوی و پەرەپێدانی چوار کێڵگەی نەوتە لە کەرکوک، هەروەها کۆمپانیا نیشتمانییەکانی دەرهێنان بەرپرسیارن لە 70%ی چالاکییەکانی کارپێكردن".

باسم محەمەد خوزەیر، یاریدەدەری وەزیری نەوتی عێراق ئەمڕۆ یەكشەممە بە ئاژانسی هەواڵی عێراقی ڕاگەیاند، وەزارەتەکەیان هەوڵدەدات توانای بەرهەمهێنانی نەوت و گاز لە چوارچێوەی پلانێکی پێنج ساڵەی دیاریکراودا زیاد بکات، بە ئامانجی ئەوەی کە لە نێوان ساڵانی 2028 بۆ 2029 بەرهەمهێنانی نەوت لە ڕۆژێکدا بۆ زیاتر لە شەش ملیۆن بەرمیل بەرزبكەنەوە.
ئاماژەی بەوەشكرد، وەزارەتی نەوت کاردەکات بۆ گەیشتن بەو ئامانجانە لەرێگەی پڕۆژەکانیەوە کە سەرجەم پارێزگاکان لەخۆدەگرێت، بەسود وەرگرتن لەو چالاکی گەڕانانەی کە کۆمپانیای دۆزینەوەی نەوتەوە ئەنجامی دەدات، هەروەها كارەكانی هەڵکەندن و بەرهەمهێنان لە کێڵگەکاندا لەرێی شەش خولەكەی مۆڵەپێدانەوە دەبێت.
ئەو بەرپرسەی وەزارەتی نەوتی عێراق باسی لەوەشكرد، لە دیارترین پڕۆژەکانی ئێستا لە کەرتی دەرهێناندا، پڕۆژەی پەرەپێدانی غازە لە باشور، لە کێڵگەی ئەرتاوی، جگە لە پڕۆژەکانی دیکە، لەوانە پڕۆژەی پەرەپێدانی چوار کێڵگەی گرنگ لە کەرکوک، کە رێککەوتن لەبارەیانەوە کراوە و بڕیارە لە چەند رۆژی داهاتودا گرێبەستی کۆتایی لەگەڵ کۆمپانیای بی پی-ی بریتانی واژۆبکرێت.

ئەوەشیخستەڕو، کۆمپانیا نیشتمانییەکانی دەرهێنان لەئێستادا بەرپرسیارن لە 70%ی چالاکییەکانی کارپێكردن.