کۆشکی سپی: دانوستانەکانی ئێران وئەمریکا لەعومان زۆر ئەرێنی و بنیاتنەر بووە

23:48 2025-04-12 69409 عەرەبی و نێودەوڵەتی 0

2025-04-12

69409

کۆشکی سپی ڕۆژی شەممە ڕایگەیاند، ستیڤن ویتکۆف، نێردەی تایبەتی سەرۆكی ئەمریکا بۆ ڕۆژهەڵاتی ناوەڕاست لەگەڵ عەباس عەراقچی، وەزیری دەرەوەی ئێران کۆبوەتەوە و وتوێژی "زۆر ئەرێنی و بنیاتنەر"ی لەگەڵدا کردوە، هەروەها شەممەی داهاتو جارێكی دیكە شاندی هەردو وڵات كۆدەبنەوە.

کۆشکی سپی، ئەمشەو لە ڕاگەیەندراوێكدا بڵاویكردەوە، ستیڤن ویتکۆف، نێردەی تایبەتی ئەمریکا لەگەڵ عەباس عەراقچی، وەزیری دەرەوەی ئێران کۆبوەتەوە و گفتوگۆی "زۆر ئەرێنی و بنیاتنەر"ی لەگەڵدا کردوە.
ئاماژەی بەوەشكردوە، ستیڤن ویتکۆف نێردەی تایبەتی ئەمریكا دڵنیایی داوەتە عەباس عێراقچی کە ڕێنمایی لە ترەمپ وەرگرتوە بۆ چارەسەرکردنی ناکۆکییەکانی نێوان هەردو وڵات لە ڕێگەی دیالۆگ و دیپلۆماسییەوە، ئەگەر بتوانرێت.
بەگوێرەی راگەیەندراوەكەی كۆشكی سپی، ئەو پرسانە لەڕادەبەدەر ئاڵۆزن. ئەو پەیوەندییە ڕاستەوخۆیەی ئەمڕۆ لەلایەن نێردەی تایبەت ویتکۆفەوە ئەنجامدراوە، هەنگاوێکە بۆ پێشەوە بەرەو بەدەستهێنانی دەرئەنجامێکی سودبەخشی دولایەنە بۆ هەردو وڵات و ڕۆژی شەممەی داهاتو هەردولا جارێکی دیکە کۆدەبنەوە.
لەلایەكی دیكەوە ستیڤ ویتکۆف، نێردەی تایبەتی ترەمپ لەبارەی دانوستانی ئەمڕۆی نێوان ئێران و ئەمریکا لە عومان پەیامێكی لە پلاتفۆڕمی "X" بڵاوكردەوە و ڕایگەیاند، "گفتوگۆیەکی زۆر ئەرێنی و بونیادنەرمان ئەنجامداوە و ئەمڕۆ دەگەڕێمەوە بۆ ئەمریکا".
هاوكات عەباس عێراقچی، وەزیری دەرەوەی ئیران ڕایگەیاند، "دوای دو كاتژمێر و نیو دانوستانی ناڕاستەوخۆی نێوان شاندەكانی ئێران و ئەمریكا لە کەشێکی بنیاتنەرانە لەسەر بنەمای ڕێزگرتنی یەکتر، كۆبونەوەكە كۆتاییهات و شاندەکانی هەردولا بۆ ماوەی چەند خولەکێک لە کاتی چونەدەرەوە قسەیان کرد و هەفتەی داهاتوش ئەم دانوستانانە بەردەوام دەبن".