ئەمڕۆ پێنجشەممە، ئەنجومەنی باڵای دادوەری جەختی لە ئامادەیی و پابەندبوونی تەواو کردەوە بۆ جێبەجێکردنی ئەرکەکانی لە دەستوور و یاسادا، بۆ مسۆگەرکردنی بێگەردی و شەفافییەتی پرۆسەی هەڵبژاردن لە هەموو قۆناغەکانیدا.
لە ڕاگەیەندراوێکدا کەدەستی موتەڵع کەوتووە،تیایدا هاتووە، ئەنجومەنی باڵای دادوەری ڕایگەیاند: "ئەنجومەنی باڵای دادوەری ئەمڕۆ بەیانی چواردەهەمین دانیشتنی خۆی بە سەرۆکایەتی سەرۆکی دادگای فیدراڵی، فائیق زێدان، ئەنجامدا، و لە میانی دانیشتنەکەدا ژمارەیەک دادوەر و ئەندامی داواکاری گشتی پلەی بەرزکرایەوە، جگە لە گواستنەوە و نوێنەرایەتی و پێدانی پۆستی دادوەری کە پێویستە بە پێدانی ڕێکخستنەوە لە هەندێک سەرۆکایەتی تێهەڵچوونەوە، بە پشتبەستن بە پێداویستییەکانی بەرژەوەندی گشتی".
ئەنجومەنەکە "سوپاس و پێزانینی خۆی ئاراستەی سەرۆکی داواکاری گشتی، نەجم عەبدوڵڵا ئەحمەد و سەرۆکی دەستەی چاودێری دادوەری، لەیس جەبر حەمزە و چاودێرانی دادوەری، ناسر سەعدون زاجی و حوسام عەبدولئەمیر موحسین و عادل خدر عەباس و بەشار جەبار خەشیش و عەلی ئەنوەر دڵف کرد، بۆ هەوڵەکانیان و ڕۆڵی چاودێری مەیدانییان لە دادگاکانی تێهەڵچوونەوە، هەروەها ئەنجومەنەکە سوپاس و پێزانینی خۆی ئاراستەی سەرۆکی دادگای تێهەڵچوونەوەی بەسڕە، عادل عەبدولڕەزاق عەباس و سەرۆکی دادگای تێهەڵچوونەوەی نەجەف، حەسەن سودی حەسەن و سەرۆکی دادگای تێهەڵچوونەوەی زیقار، عەلی عەبدولغەنی جەلاب کرد، بۆ هەوڵەکانیان لە پەرەپێدانی بیناکانی دادگاکانی تێهەڵچوونەوەی سەر بە خۆیان".
لە ڕاگەیەنراوەکەدا هاتووە، "لەسەر بنەمای هەوڵەکانی ئەنجومەنی باڵای دادوەری بۆ هاوکاریکردنی پەرەپێدانی تەکنەلۆجی و کەمکردنەوەی بارگرانی لەسەر هاوڵاتیان، ئەنجومەنەکە بڕیاریدا میکانیزمێکی نوێ پەسەند بکات بۆ پێشکەشکردنی داواکارییەکانی دووبارە لێکۆڵینەوە و دادگاییکردن بۆ لیژنە دادوەرییە تایبەتمەندەکان بۆ جێبەجێکردنی بڕگەکانی یاسای لێبوردن ژمارە (27)ی ساڵی 2016ی هەموارکراو بە یاسای ژمارە (2)ی ساڵی 2025 لەو پارێزگایانەی کە دادگاییکردن تیایاندا لە سەرەتاوە ئەنجامدراوە".
ڕوونیشیکردەوە، "ئەم لیژنانە داوای دۆسییەکانی سکاڵا لەو دادگایانە دەکەن کە سکاڵاکانیان بۆ گوازراوەتەوە و لێکۆڵینەوەیان لێدەکەن و ئاراستەی ئەو دادگایانەیان دەکەن کە لە سەرەتاوە بڕیارەکەیان دەرکردووە بۆ دووبارە دادگاییکردن بە بەکارهێنانی تەکنەلۆجیای (ڤیدیۆ کۆنفرانس)، ئەمەش ڕێگە بە سزادراوان دەدات لە دامەزراوە چاکسازییەکاندا بمێننەوە لە کاتی دانیشتنەکانی دادگاییکردندا".
سەبارەت بە هەڵبژاردنی ئەنجومەنی نوێنەران کە بڕیارە لە 11ی تشرینی دووەمی 2025 بەڕێوەبچێت، ئەنجومەنی باڵای دادوەری، بەپێی ڕاگەیەنراواکە، جەختی لە "ئامادەیی و پابەندبوونی تەواو" کردەوە بۆ جێبەجێکردنی ئەرکەکانی لە دەستوور و یاسادا، بۆ مسۆگەرکردنی پاکێتی و شەفافییەتی پرۆسەی هەڵبژاردن لە هەموو قۆناغەکانیدا، بۆ ئەوەی دادگا وەک قەڵغانێکی پتەو بۆ ئیرادەی گەل و هاوبەشێکی سەرەکی لە بەهێزکردنی دیموکراسی و گواستنەوەی ئاشتییانەی دەسەڵات لە ڕێگەی سندوقەکانی دەنگدانەوە بمێنێتەوە