سکاڵای سەرۆککۆماری عێراق دژی سەرۆکوەزیران کاردانەوەی نێوخۆی بەدوای کێشا

14:23 2025-02-10 105854 عێراق 0

2025-02-10

105854

سکاڵای سەرۆک کۆماری عێراق، د. عەبدوللەتیف جەمال ڕەشید بۆ سەر سەرۆکوەزیرانی عێراق، محەممەد شەیاع سودانی بووە هۆی کاردانەوەی توند لەنێوخۆی عێراق، ئەوەش دوای ئەوەدێت ڕۆژی یەکشەممە سەرۆک کۆماری عێراق سکاڵای لەسەر سەرۆکوەزیران تۆمارکرد بەهۆی بەردەوامی دواکەوتنی دابەشکردنی مووچەی فەرمانبەرانی هەرێم.
عالیە نەسیف، پەرلەمانتاری عێراق لەو بارەیەوە لە هەژماری خۆی لە تۆڕی کۆمەڵایەتی ئێکس نوسیویەتی، "جێگەی گاڵتەجاڕییە کە سەرۆک کۆمار سکاڵای لەسەر سەرۆک وەزیران بەهۆی مووچەی فەرمانبەرانی هەرێم تۆمارکرد، ئەم سکاڵایە لادانێکە لەو ڕاستییەی کە سەرۆک کۆمار پشتگوێی دەخات و ئاگرەکەی ئاراستەی سودانیی دەکات کە دڵسۆزانە داکۆکی لە مافی فەرمانبەران و چەوساوەکانی هەرێم کردووە و تا ئێستاش بەردەوامە".

زانیاری زیاتر...
ڕۆژی یەکشەممە سەرۆكایەتی كۆماری عێراق سەبارەت بەمووچەی فەرمانبەرانی هەرێمی كوردستان سكاڵایەكی لەسەر سەرۆکوەزیران و سەرۆكی ئەنجومەنی نوێنەران و وەزیری دارایی عێراق تۆماركردووە.
لە كۆنگرەیەكی رۆژنامەوانیدا، هاوڕێ تۆفیق لێپرسراوی پەیوەندییەكان لەسەرۆكایەتی كۆماری عێراق، رایگەیاند: سكاڵاكە بەهۆی دواكەوتنی دابەش نەكردنی مووچەی فەرمانبەرانی هەرێمی كوردستانەوە تۆماركراوە، وتیشی: داوا دەكەن وەزیری دارایی پابەند بكرێت بەناردنی پارەی مووچەی فەرمانبەران، هاوكات تەئكیدی لەوەشكردۆتەوە، پێویستە وەزارەتی دارایی عیراق بەشێوەیەكی بەردەوام مووچەی مووچەخۆرانی هەرێم بنێرێت و هیچ دواكەوتنێكی تێدا نەبێت.