ترەمپ: واشنتن و پەکین لەبارەی ئاساییکردنەوەی پەیوەندییە ئابوورییەکانیان ڕێک کەوتن ‏

23:40 2025-06-11 65325 عەرەبی و نێودەوڵەتی 0

2025-06-11

65325

ئەمڕۆ چوارشەممە، دۆناڵد ترەمپ سەرۆکی ئەمەریکا، رایگەیاند واشنتن و پەکین لەسەر ئاساییکردنەوەی پەیوەندییە بازرگانییەکانییەکانیان ڕێک کەوتن. ئاماژەی بەوەکرد، لەگەڵ سەرۆکی چین هەماهەنگی دەکەین، بۆ باشترکردنی پەیوەندییەکانمان.
‏
‏ شاندی ئەمەریکا و چین لە بارەی ئاساییکردنەوەی پەیوەندییە ئابوورییەکانی نێوانیان لە لەندەن کۆ بوونەوە. هاوکات هەردوولا لەسەر چوارچێوەیەکی گشتی بۆ چارکردنی ناکۆکییە بازرگانییەکان ڕێک کەوتن و ئەرکی پەسەندکردنی ڕێککەوتنەکەشیان بۆ سەرۆکەکانی هەردوو وڵات جێ هێشتووە.
‏
‏سکۆت بیسنت، وەزیری گەنجینەی ئەمەریکا، بە ئەندامانی کۆنگرێسی وڵاتەکەی ڕاگەیاند: چین دەرفەتێکی ناوازەی هەیە بۆ سەقامگیرکردنی ئابوورییەکەی، ئەویش بە گواستنەوە لە بەرهەمهێنانی زیادەوە بۆ بەکارهێنانی زیاتر.
‏
‏لەلایەکی دیکەوە، ھاوارد لوتنیک، وەزیری بازرگانیی ئەمەریکا لە لێدوانێکی ڕۆژنامەوانیدا، گوتی: چین بە زووترین کات ڕەزامەندیی لەسەر هەناردەکردنی کانزا دەگمەنەکانی بۆ ئەمەریکا دەدات، ئەمەش دوای ئەوەی کە سەرۆکی هەردوو وڵات ڕێککەوتنەکە پەسەند دەکەن.
‏
‏لای خۆیەوە دۆناڵد ترەمپ، سەرۆکی ئەمەریکا، لە هەژماری خۆی لە تۆڕی کۆمەڵایەتی تروس، نوسیوویەتی: پاش دوو ڕۆژ لە دانوستانی بەردەوامی نێوان شاندی واشنتن و پەکین، لە کۆتاییدا لەبارەی ئاسییکردنەوەی پەیوەندییە بازرگانییەکان ڕێک کەوتن کراوە، تەنیا ڕەزامەندیی کۆتایی من و شی جین پینگ، ماوە.
‏
‏سەرۆکی ئەمەریکا، ئاشکرای کرد، پەیوەندیی نێوان هەردوو وڵات زۆر ناوازەیە، هەروەها ڕێز لە پابەندبوونەکانمان دەگرین بە تایبەتی لە ڕێگەدان بە قوتابییانی چین بۆ خوێندن لە زانکۆکانی ئەمەریکا.
‏
‏جەختی لەوەش کردەوە، لەگەڵ سەرۆکی چین لە هەماهەنگیداین بۆ باشترکردنی پەیوەندییە ئابوورییەکانی نێوان هەردوو وڵات.
‏
‏ئەمەریکا کانزا دەگمەنەکان بۆ دروستکردنی پاتری کارەبایی و تۆربایینەکانی با، هەروەها سیستەمی بەرگریی وەک مووشەک ڕادار و مانگی دەستکرد بەکار دەهێنێت.
‏
‏ بەڵام چین لە بەرانبەردا، دەیەوێت ئەمەریکا بە هەندێک سنووردارکردنی هەناردەکردندا بچێتەوە کە بەسەر بەرهەمەکانیدا سەپێنراوە، بە تایبەتی ئەوانەی پەیوەندییان بە تەکنەلۆجیاوە هەیە.