عێراق ژووری فریاکەوتن چالاک دەکات لە پێشبینی هەر دزەکردنی تیشکدەر بۆ وڵات

18:43 2025-06-17 64098 عێراق 0

2025-06-17

64098

ده‌سته‌ی نیشتمانیی ڕێکخستنی ئەتۆمی وتیشك پشتڕاستی کردەوە کە تا ئێستا هیچ نیشاندەرێکی مەترسیدار دەستنیشان نەکراوە، ئەمەش لەبەر ڕۆشنایی پەرەسەندنی دۆخی ناوچەکە، ئاماژەی بەوەشکردووە، پلانی سێ لایەنە کە یەکێکیان ناوچەییە، ئامادە دەکرێت بۆ ڕووبەڕووبوونەوەی هەر مەترسییەکی تیشکدەر.
سەباح حوسێنی، بەڕێوەبەری پاراستن و تیشکدانەوە لە ده‌سته‌كه‌ لەلێدوانێکیدا بەمیدیای فەرمی کەموتەڵع بەدواداچوونی بۆ کردووە ڕایگەیاند: "لەبەر ڕۆشنایی بارودۆخی ئێستا و ئەو ڕووداوانەی لە نێوان ئێران و قەوارەی زایۆنیستی ڕوودەدەن، ده‌سته‌ی نیشتمانیی ڕێکخستنی ئەتۆمی وتیشك بەردەوامە لە چاودێریکردنی دۆخەکە لە ڕێگەی تۆڕی ئاگادارکردنەوەی پێشوەختە کە لە سەرانسەری عێراق بڵاوبووەتەوە، کە تۆڕێکی مۆدێرن و کاریگەرە".

حوسێنی ڕوونیکردەوە کە "دەروازە سنوورییەکان بە بەکارهێنانی دەروازەکانی پشکنینی تیشک چاودێری دەکرێن، کە تێیدا پاشخانی تیشکدانەوە دەخوێندرێتەوە و ڕاستەوخۆ دەنێردرێت بۆ وێستگە ناوەندییەکانی ناو ئۆفیسەکانی ده‌سته‌كه‌". ئاماژەی بەوەشکرد، "سەرۆکی ده‌سته‌ی نیشتمانیی ڕێکخستنی ئەتۆمی وتیشك شەممەی ڕابردوو سەرۆکایەتی ژووری فریاکەوتنی نیشتمانی کرد، کە نوێنەرانی سەرجەم دەسەڵاتە پەیوەندیدارەکان لەخۆدەگرێت". ئاماژەی بەوەشکرد، "کار لەم قۆناغەدا بەسەر دوو بەشدا دابەشکراوە: چاودێریکردن و وەڵامدانەوە، عێراق خاوەنی سیستەمی مۆدێرن و توانای و دەستنیشانکردنی هەر زیادبوونێکی تیشکی پاشخانی هەیە، تا ئێستا سەرەڕای ئەو لێدانانەی کە دامەزراوەکانی ناوخۆی ئێران دەکەنە ئامانج، هیچ پەککەوتن و زیادبوونی تیشکدانەوە لەسەر خاکی عێراق تۆمارنەکراوە".

حوسێنی لە درێژەی قسەکانیدا وتی "سەبارەت بە وەڵامدانەوە، پلانێکی نیشتمانی چالاک هەیە بۆ چارەسەرکردنی حاڵەتە فریاگوزاریەکان. ژووری فریاکەوتن هەموو شەممەیەک لە دانیشتنی کراوەدایە، پلانە نیشتمانییەکان دەستبەجێ چالاک دەکرێن لەگەڵ ڕوودانی هەر ڕووداوێکی ئەگەری".

ئاماژەی بەوەشکرد، "پلانێکی هەرێمیش هەیە بۆ چارەسەرکردنی حاڵەتە لەناکاوەکان، کە عێراق شانبەشانی ژمارەیەک وڵاتی عەرەبی بەشداری تێدا دەکات ، وەک بەشێک لە پلانی قەیران و ڕووداوەکانی کۆمکاری عەرەبی پەسەندکرا و هەروەها لە ئەیلوولی ٢٠٢٤ لەلایەن ئاژانسی نێودەوڵەتی وزەی ئەتۆمی پەسەندکرا".

حوسێنی پەیامێکی دڵنیاکەرەوەی نارد و دووپاتیکردەوە کە "تا ئێستا دۆخەکە سەلامەتە، و هیچ ئاماژەیەک نییە بۆ مەترسییەکی تیشکی کە لە ئەنجامی ڕووداوە بەردەوامەکانەوە بێت". جەختیشی لەوە کردەوە، "ئێمە بەردەوامین لە چاودێریکردن، پلانە نیشتمانی و ناوچەییەکان لە ئەگەری ڕوودانی هەر حاڵەتێکی لەناکاوی تیشکی یان ئەتۆمیدا چالاک دەکرێن".