تاران نیگەرانی دەربڕی بەرامبەر گەمارۆکان و بانگهێشتی باڵیۆزەکانی لە سێ وڵات دەکات

12:22 2025-09-27 42134 عەرەبی و نێودەوڵەتی 0

2025-09-27

42134

وەزارەتی دەرەوەی ئێران رایگەیاند، باڵیۆزانی وڵاتەكەی لە بەریتانیا و ئەڵمانیا و فەرەنسا بۆ راوێژ بانگكردونەتەوە بۆ تاران. چاوەڕان دەكرێت لە سبەی یەكشەممەوە سزا نێودەوڵەتییەكان بەسەر ئێراندا بسەپێندرێنەوە ئەوەش دوای ئەوەی ئەنجومەنی ئاسایشی نێودەوڵەتی پێشنیارێكی چین و روسیای بۆ دواخستنی گەڕاندنەوەی سزاكانی سەر ئێران، رەتكردەوە.

وەزارەتی دەرەوەی ئێران رایگەیاند، لەدوای هەنگاوەكەی سێ وڵاتە ئەوروپییەكە بۆ كاراكردنی سناپ باك، باڵیۆزانی وڵاتەكەی لە بەریتانیا و ئەڵمانیا و فەرەنسا بۆ راوێژ بانگكردونەتەوە بۆ تاران.

ئەوەش لەدوای ئەوەی دێت كە دوێنێ هەینی، ئەنجومەنی ئاسایشی نێودەوڵەتی، پێشنیاری بڕیارێكی چین و روسیای بۆ دواخستنی سەپاندنەوەی سزا نێودەوڵەتییەكان بەسەر ئێراندا رەتكردەوە.

رەشنوسی پێشنیارەكەی چین و روسیا لە ئەنجومەنی ئاسایشی نێودەوڵەتی بە 9 دەنگی نەخێر و 4 دەنگی بەڵێ و 2 دەنگی بێلایەن، رەتكرایەوە.

چین و روسیا لە پێشنیارەكەدا داوایان كردبو ماوەی مۆڵەتی سەپاندنەوەی سزا نێودەوڵەتییەكان بەسەر ئێراندا تاوەكو بەهاری ساڵی داهاتو درێژبكرێتەوە.

بە رەتكردنەوەی ئەو پێشنیارە، چاوەڕوان دەكرێت سزا نێودەوڵەتییەكان لە سبەی یەكشەممەوە بەسەر ئێراندا بسەپێندرێنەوە.

عەباس عراقچی، وەزیری دەرەوەی ئێران لە كاردانەوەیدا بەرامبەر رەتكردنەوەی پێشنیارەكە لەلایەن ئەنجومەنی ئاسایشەوە، وتی، ئێران هەرگیز ناچێتە ژێر باری هەڕەشەو گوشارەكان و بەرپرسیارێتی "لێكەوتە خراپەكان"ی ئەم بڕیارە لە ئەستۆی سێ وڵاتە ئەوروپییەكەو ئەمریكادایە.

پێشتر بنیامین نەتەنیاهو، سەرۆك وەزیرانی ئیسرائیل لە وتەكەیدا لە كۆمەڵەی گشتی نەتەوە یەكگرتوەكان رایگەیاند، دەبێت سزاكانی ئەنجومەنی ئاسایشی نێودەوڵەتی بەسەر ئێراندا بسەپێندرێنەوە.