مەسعود بارزانی، سه‌رۆكی پارتی له‌گه‌ڵ جان نوێل بارۆ، وەزیری دەرەوەی فڕەنسا كۆبوه‌وه و رایگه‌یاند، خوازیاری ئەوەن سەرجەم كێشە و گرفتەكانی ناوچەی ڕۆژهەڵاتی ناوەڕاست بە ڕێگەی ئاشتیانە بگاتە چارەسەر و ناوچەكە سەقامگیری بەخۆیەوە ببینێت، بارۆتیش ده‌ڵێت، "وڵاتەكەی هەمیشە سۆزێكی تایبەتی بۆ دۆزی گەلی كوردستان هەبوە لە ڕۆژهەڵاتی ناوەڕاست".
به‌گوێره‌ی راگه‌یه‌ندراوێكی باره‌گای بارزانی، مەسعود بارزانی ئه‌مڕۆ لە پیرمام له‌گه‌ڵ وه‌زیری ده‌ره‌وه‌ی فڕه‌نسا كۆبوه‌وه‌ و لە دیدارەكەدا كە پاتریك دورێل، باڵیۆزی فڕەنسا لە عێراق و یان برێم، كونسوڵی گشتیی فڕەنسا لە هەولێر ئامادەی بو، وەزیری دەرەوەی فەڕەنسا ئاماژەی بە هەوڵە بەردەوامەكانی ماكرۆن و بارزانیدا لە هاندانی لایەنەكان بۆ گەیشتن بە ڕێككەوتن لە سوریا و ئەو هەوڵانەی بەرزنرخاند.

ئاماژه‌ به‌وه‌شكراوه‌، وه‌زیری ده‌ره‌وه‌ی فڕه‌نسا "نامەیەكی مه‌لا مسته‌فا بارزانی پێشكەشی مه‌سعود بارزانی كرد كە لە ساڵی 1967 لە لایەن بارزانیه‌وه‌ بۆ جەنەڕاڵ دیگۆل سەرۆكی فڕەنسا نێردرابو و لە ئەرشیڤی وەزارەتی دەرەوەی فەڕەنسادا هەڵگیرابو".

له‌ راگه‌یه‌ندراوه‌كه‌دا هاتوه‌، هەر لەو دیدارەدا بیروڕا لەبارەی بارودۆخی سیاسیی ناوچەكە و سوریا و پڕۆسەی ئاشتی لە توركیا و پڕۆسەی سیاسی عێراق و هەرێم ئاڵوگۆڕ كرا و بارزانی جەختی لەوە كردەوە كە "خوازیاری ئەوەن سەرجەم كێشە و گرفتەكانی ناوچەی ڕۆژهەڵاتی ناوەڕاست بە ڕێگەی ئاشتیانە بگاتە چارەسەر و ناوچەكە سەقامگیری بەخۆیەوە ببینێت".

په‌یوه‌ست به‌ پڕۆسه‌ی ئاشتی له‌ توركیا، مه‌سعو بارزانی هیوای خواستوه‌ كە پڕۆسەی ئاشتی لە توركیا بە ڕێگەی دیالۆگ بگاتە ئەنجام و هەمیشە پشتیوانی ئەو پڕۆسەیە بون.

له‌باره‌ی رۆژاڤاشه‌وه‌، مه‌سعود بارزانی وتویه‌تی، "هەمو هەوڵی خۆم بەكارهێنا بۆ ئەوەی ڕێگری بكرێت لەوەی ناكۆكی سیاسی بكرێتە شەڕی نەتەوەیی نێوان كورد و عەرەب و هەروەها ڕێگری لەوە بكرێت كە پاكتاوی ڕەگەزی لەدژی گەلی كورد لە سوریا ڕوبدات"، جەختیشی لەوە كردەوە كە پشتگیری لە ڕێككەوتنی نێوان حكومەتی سوریا و هەسەدە دەكەن.
به‌گوێره‌ی راگه‌یه‌ندراوه‌كه‌، مه‌سعود بارزانی لەبارەی مەترسیی سەرهەڵدانەوەی تیرۆر ئەوەی خستەڕو، "مەترسی بەهێزبونەوەی داعش لەئارادایە و پێویستە میكانیزمێكی گونجاو و هەماهەنگیی لەنێوان لایەنەكان هەبێت بۆ ڕوبەڕوبونەوەی هەڕەشەی تیرۆر و داعش".

هاوكات وەزیری دەرەوەی فڕەنسا جەختی لەوە كردەوە كە وڵاتەكەی هەمیشە سۆزێكی تایبەتی بۆ دۆزی گەلی كوردستان هەبوە لە ڕۆژهەڵاتی ناوەڕاست و پاڵپشتی ئەوەیە گەلی كوردستان بە ڕێگەی ئاشتیانە بە مافەكانی خۆی شاد ببێت و هەروەها وڵاتەكەی لەگەڵ پاراستنی هەرێمی كوردستان و بەردەوامیی هەرێمی كوردستانێكی بەهێزدایە.