سودانی: عێراق لە هەوڵەکانیدا درێغی ناکات لە پێناو بەدیهێنانی ئاگربەست ‏

23:00 2026-03-13 48809 عێراق 0

2026-03-13

48809

ئەمڕۆ هەینی"موحەممەد شیاع سودانی" سەرۆک وەزیرانی عێراق، جەختی کردەوە کە عێراق درێغی ناکات لە هەوڵەکانی لە پێناو بەدیهێنانی ئاگربەستدا.
‏نووسینگەی ڕاگەیاندنی سەرۆک وەزیران لە ڕاگەیەندراوێکدا بڵاویکردەوە : "موحەممەد شیاع سودانی" سەرۆک وەزیران، پەیوەندییەکی تەلەفۆنی لە "ئیمانوێل ماکرۆن" سەرۆکی فەرەنسا پێگەیشت، کە تێیدا تاوتوێی دوایین پێشهاتەکانی دۆخی ناوچەکە و ئەو هەوڵانە کرا کە دەدرێن بۆ ڕاگرتنی چالاکییە سەربازییەکان کە دوای دەستدرێژی بۆ سەر کۆماری ئیسلامیی ئێران دەستیان پێکردووە.
‏بەگوێرەی ڕاگەیەندراوەکە :"سوودانی " ڕوونیکردەوە کە عێراق لە هەوڵەکانی درێغی ناکات بۆ بەدیهێنانی ئاگربەست و کۆتاییهێنان بەو شەڕەی کە فراوان بووە و بووەتە هەڕەشە بۆ سەر سەقامگیری و ئاسایشی ناوچەکە، هەروەها دووپاتی کردەوە کە عێراق ئەو پەلامارە ڕاشکاوە ڕەت دەکاتەوە کە سەروەریی عێراقی کردە ئامانج و بووە هۆی شەهیدبوونی ژمارەیەک لە ڕیزەکانی هێزە ئەمنییەکانمان لە حەشدی شەعبی، ئەوەش بە مەبەستی تێکەڵکردنی کاغەزەکان و تێکدانی ئاشتیی کۆمەڵایەتی کە بە هۆی قوربانیدانی عێراقییەکان لە ڕووبەڕووبوونەوەی تیرۆر بەدیهاتبوو.
‏سەرۆک وەزیران هاوسۆزی خۆی دەربڕی بەرامبەر بە قوربانیانی فەرەنسی لەو هێزەی لە پارێزگای هەولێر بوونیان هەیە، لە چوارچێوەی هاوپەیمانیی نێودەوڵەتی بۆ ڕووبەڕووبوونەوەی داعش،و جەختی لە ئەنجامدانی لێکۆڵینەوە لەو ڕووداوە و گرتنەبەری ڕێکاری پێویست بۆ ڕێگریکردن لە دووبارەبوونەوەی ئەم جۆرە ئامانجگرتنە کردەوە.
‏لە بەرامبەردا،سەرۆکی فەرەنسا پشتیوانیی خۆی بۆ ئەو هەوڵە ناوچەیی و نێودەوڵەتییانە دەربڕی کە هەوڵ دەدەن بۆ ڕاگرتنی شەڕ و ڕێگریکردن لە خراپتربوونی دۆخی ئەمنی،و جەختی لە ڕۆڵی محوەریی عێراق کردەوە لە ئاسانکاریکردنی ئەم تێگەیشتنانە، کە بە ئەرێنی بەسەر سەقامگیریی ناوچەکەدا دەشکێتەوە،هەروەها ئاماژەی بە پێویستیی بەردەوامیی هەماهەنگیی دوولایەنە لەم بوارەداکرد.