سەرۆک کۆمار سەردانی پەرلەمانی قوبرسی کرد

00:11 2023-12-13 33009 عێراق 0

2023-12-13

33009

سەرۆک کۆمار دکتۆر لەتیف جەمال رەشید سەردانی پەرلەمانی قوبرسی کرد و لەلایەن خاتوو ئەنیتا دیمیتریۆ سەرۆکی ئەنجومەنی نوێنەرانەوە پێشوازیی لێکرا. نووسینگه‌ی راگه‌یاندنی سه‌رۆكایه‌تی كۆمار له‌راگه‌یه‌ندراوێكدا كه‌بڵاویکردەوه‌" لە دیدارەکەدا، کە ئەمڕۆ سێشەممە بەڕێوەچو، پێشهاتەکانی بارودۆخی سیاسی و پرسە نێودەوڵەتییە جێبایەخە هاوبەشەکان تاووتوێ کران، لەو چوارچێوەیەدا سەرۆک کۆمار تیشکی خستەسەر پێویستی بەهێزکردنی هەماهەنگی دووقۆڵی لە ئاستی پەرلەمان و ئاڵوگۆڕکردنی ئەزموونی یاسایی و یاسادانان لەنێوان پەرلەمانی عیراق و قوبرس و گرنگی پێکهێنانی لیژنەیەکی دۆستایەتی عیراقی و قوبرسی و چالاککردنی پەیوەندییەکانی نێوان هەردوولا بەشێوەیەک، کە ببێتە هۆکار بۆ پەرەپێدانی کاری پەرلەمانی و یاسادانان. هەروەها بەڕێزیان باسی دیدارەکەی لەگەڵ هاوتا قوبرسییەکەی و کۆبوونەوە فراوانەکەی وەفدی هەردوو حکومەت و ئەنجامە ئەرێنییەکەی کرد و ئەو دیدارەیشی بەکۆڵەکەی سەرەکی پەیوەندییە دوو قۆڵییە بەهێزەکان پێناسەکرد، کە دەتوانێت هیوای هەردوو گەلی دۆست لە پێشکەوتن و خۆشگوزەرانی بەدەستبهێنێت. سەرۆک کۆمار ئاماژەی بەوەشدا، کە عیراق لە ئاستی ئەمنی و سیاسی و ئابووری لە قۆناغێکی سەقامگیریدا دەژی و لەهەمانکاتدا پێشوازی لە بەشدارییەکانی کۆمپانیاکانی قوبرس دەکات لەکەرتی وەبەرهێنان و ئاوەدانکردنەوە و ئاماژەی بە گرنگی کاراکردنی گواستنەوەی ئاسمانی لە نێوان عیراق و قوبرسدا کرد بۆ پتەوکردنی میکانیزمەکانی پەیوەندیکردن. هەر لە دیدارەکەدا جەخت لەوە کرایەوە، پێویستە دیپلۆماسێتی کلتووری لە نێوان عیراق و قوبرسدا هەبێت، کە رێگا خۆش بکات بۆ هەماهەنگی لە بواری شوێنەوارە کۆنەکان و پاراستنیان و پارێزگاریکردن لە کەلەپوری شارستانی و کولتوری هەردوو وڵات. سەرۆک کۆمار تێڕوانینی خۆی بۆ داهاتووی ناوچەکە و دەرئەنجامە ئەرێنییەکانی بەهێزکردنی ئاسایش و سەقامگیری لەسەر سروشتی پەیوەندییەکانی نێوان وڵاتان و خواستەکانی میللەتەکانیان بۆ ژیانێکی سەلامەت و سەقامگیر و پشتیوانیکردن لە مافی گەلی فەڵەستین بۆ بەدەستهێنانی هەموو مافە رەواکانیان و دیاریکردنی چارەنووسیان خستەڕوو. لەلای خۆیەوە، خاتوو دیمیتریۆ خۆشحاڵی خۆی دەربڕی بە دیدارەکەی لەگەڵ سەرۆک کۆمار و جەختی لە پەرۆشی وڵاتەکەی کردەوە بۆ فراوانکردنی ئاسۆی هاریکاری لەگەڵ عیراق لە بوارە جیاجیاکاندا بەمەبەستی بەدیهێنانی بەرژەوەندییە هاوبەشەکان.